BMW го претставија новото специјално издание на нивниот M4 кабриолет насловено “30 Jahre”, во превод “30 години“, модел кој ќе се произведе во лимитиран број. Истиот е замислен како прослава на 30 годишнината од првиот M3 кабриолет, кој по 5 генерации во 2014 беше преименуван во М4.
Од компанијата велат дека од ова специјално издание ќе бидат произведени само 300 примероци, кои ќе доаѓаат со M Competition пакетот како стандард. Тоа значи дека кабриолетот ќе има 6-цилиндричен 3.0 литарски турбо мотор од 450 коњски сили и 500Nm вртежен момент, M Sport издувен систем, адаптивна M суспензија (со спортски мод), и нешто што BMW го нарекува „екстремно спортска конфигурација“ на системот за контрола на стабилност.
Она што ова 30 годишно издание го двои од стандардниот M4 кабриолет е и изборот на боите – тој ќе биде на располагање само во две: “Macao Blue metallic” и “Mandarin II uni”.
Внатрешноста ќе биде од Мерино кожа со контрастни шавови на наслоните за главите и на патосниците, како и со ленти од јаглеродни влакна. Знакот на трим-лентата на страната на совозачот ќе го носи логото „30 Jahre Edition” како и број “1/300“ кој ќе го означува изданието на автомобилот (кое по ред е од сите 300 примероци).
Цената ќе му биде околу 87 000 евра.