На Geneva Motor Show Volkswagen го претставија најновиот член на комплетно електричната I.D. фамилија, наречен I.D. Vizzion.
Долг 5163mm и висок 1056mm, тој е со слична големина на Mercedes S-Class и најновото Audi A8, а неговата цел е да прикаже каква сè технологија од Volkswagen сметаат дека I.D. брендот ќе има вградено за една декада, но и да ја прикаже продукциската верзија на I.D електричната лимузина која на пазарот треба да се појави до 2022.
Концептот ја користи електричната MEB платформа, а се напојува со два електрични мотори на секоја оска. Предниот има моќност од 75kW, додека задниот 150kW, што му дава вкупна моќ од 225kW т.е 310 коњски сили. Енергијата е складирана во рамна литиум-јонска батерија од 111kWh која е поставена на подот на возилото, забрзувањето од 0-100км/ч ќе изнесува 6.3 секунди, а максималната брзина 180км/ч. Од компанијата велат дека со единечно полнење на батеријата I.D. Vizzion ќе има домет од 665km.
Поставен на 24-инчни тркала, Volkswagen го опишуваат концептот како „авангардна лимузина од висока класа“. I.D Vizzion ќе има автономија од 5-то ниво, постигната преку комбинација на поврзани ласерски скенери, ултрасонични сензори, радарски сензори и камери. Податоците за сообраќајот ќе се добиваат со “cloud computing” односно ќе се наоѓаат во „облакот“ во кој ќе бидат поврзани и останати вакви возила, а на располагање ќе биде и комуникација помеѓу автомобилите. Инаку, се смета дека ваквата технологија ќе стане реалност до 2025-та.
Во внатрешноста нема скоро никакви уреди за контрола или менување на брзини. Постојат само две реални контроли во вид на копчиња на притискање и ротирање лоцирани напред и позади во возилото, кои може да се користат за запирање на автомобилот, внесување команди во автономниот систем за возење и контролирање на гласот на аудио системот.
Поголемиот дел на функциите ќе бидат контролирани од вештачка интелигенција (AI) преку виртуелен асистент. Патниците ќе можат на автомобилот со гласовни контроли да му „наредат“ на која дестинација сакаат да одат, или пак да му се „обратат“ на асистентот преку смартфон. Ќе биде вградена и технологија за контролирање на функциите на автомобилот со гестикулации, во комплет со технологија за подобрена реалност (augmented reality (AR)
Volkswagen го опишуваат AI асистентот како „домаќин“ кој ќе ги учи навиките на секој од патниците со секое патување кое ќе го имаат во I.D. Vizzion. На располагање ќе бидат и фитнес тракери кои патниците ќе можат да ги носат и чии информации ќе му помагаат на дигиталниот домаќин да ја модификува температурата на климата доколку забележи дека на некого во автомобилот му е премногу студено или топло.