Компанијата Reviver Auto кај одредени дилери на автомобили во Калифорнија нуди дигитални регистарски таблички наречени Rplate со големина на стандардните, но кои наликуваат на iPad, а чинат исто колку него - $699 за инсталација и $7 месечни трошоци.
Што нуди оваа скапа високо-технолошка табличка во поглед на обичната?
Како прво, автоматски го регистрира возилото – нема веќе потреба за обнова преку онлајн сервисот и додавање на нова лепенка на табличката. Локацијата на возилото може да се следи доколку е украдено, а може и да се персонализира изгледот на информациите кои ги прикажува.
Rplate може и автоматски да наплатува патарини и паркинг како и да прикажува информации важни за останатите возачи (на пример кога полицијата трага по некое возило, неговиот опис е испишан на табличката за доколку некој го забележи да се јави). За жал може да биде и цел на хакерски напади во иднина бидејќи за да ги плаќа овие работи, најверојатно ќе мора да има некаков пристап до информациите поврзани со вашата банкарска сметка или картички.