Подновениот Jeep Renegade ќе се појави во продажба подоцна годинава со сменет изглед и 3 нови бензински мотори.
Претставен во 2014-та како најмалечкиот и најурбаниот модел на Jeep, овој негов фејслифт ќе треба да „трае“ до 2022-ра кога ќе се појави втората генерација, како и уште еден помал модел кој ќе биде ривал на Nissan Juke.
Коцкастиот стил инспириран од моделот Wrangler ќе биде рафиниран со серија малечки дизајнерски ревизии – напред, забележливи се новите фарови со дневни LED светла, како и редизајнираниот браник со поагресивен изглед и репозиционирани светла за магла. На задниот дел, пак, задните фарови ја имаат формата на буквата X, со LED кластери на верзиите Limited и Trailhawk. Ќе бидат понудени и 7 различни опции за тркалата, со бандажи со големина од 16 до 19 инчни.
Во внатрешноста, единствената дизајнерска промена е дека централната конзола има вграден држач за смартфони, нов оддел за складирање и држачи за чашки.
Infotainment системот останува ист, со 5 и 8.4 инчни опции за touchscreen дисплејот, од кој поголемиот доаѓа со Apple CarPlay и Android Auto интеграција.
Најголемата новост во врска со овој модел се трите нови бензински мотори: 1.0 литарски 3-цилиндричен турбо од 120 коњски сили, 90Nm вртежен момент, 6-брзински мануелен менувач и погон на предните тркала , и 1.3 литарските 4-цилиндрични од 150 и 180 коњски сили, 270Nm вртежен момент и автоматски менувач со погон на сите тркала кај помоќната верзија
1.6 и 2.0 литарските дизел мотори со погон на сите тркала остануваат, но се подновени со селективната каталитичка редукција за да се постигне стандардот Euro 6/D за регулирање на емисиите на штетните гасови.
Како и досега, Renegade верзиите со погон на сите тркала ќе имаат модови за off-road возење како што се Snow (снег), Sand (песок) и Mud (кал). Продажбата ќе започне во септември.