Новиот Peugeot 208 супермини е забележан на шпионски фотографии за прв пат, а на пазарот треба да се појави во 2019-та изграден на сосема нова платформа која ќе подржува и електричен погон.
Целосно маскираната 208-ца покажува неколку клучни детали, како новиот дизајн на предните фарови (т.н „лавовска канџа“, со 3 вертикални закосени огледала внатре), а судејќи според бројот на вратите (5), се чини дека шпекулацијата дека верзијата со 3 врати нема веќе да се произведува е точна.
Предницата ги има стилските одлики на новите 3008 и 5008 SUV модели, додека задните фарови се чини дека се целосно LED.
Изборот на мотори ќе вклучува мноштво турбо варијанти со мал капацитет, како и целосно електрична варијанта за прв пат кај овој модел.
Новата платформа е нaречена CMP (Common Modular Platform) и во неа ќе можат да се вградуваат батерии и мотори за идните комплетно електрични модели.
Бензинските мотори се очекува да бидат 3-цилиндрични турбо со моќност од 70 до скоро 152 коњски сили кај 1.2 литарската верзија, а не е познато дали ќе се нудат и дизел мотори.
Најмоќниот GTI ќе биде понуден во бензинска и електрична варијанта, а ќе има моќност од над 200 коњски сили. Електричната 208-ца ќе биде дел од планот на PSA Group да лансира 11 електрични автомобили до 2021.