Следната генерација на Audi TT ќе добие драматични промени, трансформирајќи го овој иконски спортски модел во попрактично и попрофитабилно купе со 4 врати, а на пазарот се очекува за помалку од 2 години.
Audi за првпат ја наговестиле идејата за ТТ со 4 врати со TT Sportback концептот прикажан на 2014 Paris Motor Show, а сега конечно е дадено зелено светло за нејзино реализирање.
Ова ќе биде директна замена на постоечкиот модел со 2 врати кој оваа година ја слави 20-годишнината од своето постоење.
Според скиците од Auto Express, се очекува новото ТТ да ја има својата препознатлива форма, но со продолжено меѓуоскино растојание и заден дел со цел да се создаде простор за уште 2 врати.
Пропорциите се очекува да се блиски до оние на TT Sportback концептот, што значи 290mm поголема должина, 60mm ширина и 120mm поголемо меѓуоскино растојание во однос на сегашниот модел, додека платформата ќе биде подобрена варијанта на MQB која се наоѓа под сегашниот модел.
Во споредба со скоро унапреденото купе со 2 врати кое е на располагање исклучиво со бензински мотори, новото со 4 врати ќе се нуди и во електрифицирани варијанти.
Прво ќе пристигне серијата на средно-хибридни мотори со технологија од 48 волти, кои потрошувачката ќе ја подобрат за околу 10%, а ќе биде понудена и нова генерација на електрифицирани дизел мотори.
Plug-in хибридна како и комплетно електрична варијанта ќе бидат понудени подоцна, бидејќи и двете се дел од планот на Audi да имаат 20 електрифицирани модели во продажба до 2025-та.