Новиот Bentley Continental GT кабриолет е третата генерација на овој модел, а во продажба треба да се појави на пролет по цена од 194 200 евра.
Изгледот му е скоро идентичен со оној од купе моделот, со тоа што предните тркала се поставени малку понапред.
Новиот кров е на располагање во 7 бои, а за да се отвори му се потребни 19 секунди при брзини до 50км/ч. Поради просторот за неговото складирање, малку е намалена практичноста на автомобилот бидејќи багажникот е намален на 235 литри, во споредба со 358-те литри од купе варијантата.
Новиот кров има и подобра изолација, па така новиот GTC е 3 децибели потивок од претходниот.
Внатрешноста му е слична како онаа од купето, со одредени дополнувања за задржување на комфорот без разлика дали кровот е отворен или затворен. Подобрените грејачи за врат дуваат топол воздух потивко отколку претходно, а сега има и грејачи и во седиштата и во наслоните за рацете.
Моторот ќе биде 6.0 литарски W12 со моќност од 635 коњски сили и 900Nm вртежен момент, што ќе овозможува забрзување од 0-100км/ч. за 3.7 секунди и максимална брзина од 333км/ч. Подоцна ќе се појави и верзија со V8 мотор.