Новиот Audi RS6 Avant е забележан на неофицијални фотографии за време на неговото тестирање на стазата Нурбургринг, а најверојатно ќе дебитира оваа година на Frankfurt Motor Show.
Како и сите RS брендирани модели и новиот RS6 ќе добие подновен екстериер, со поагресивен преден браник „позајмен“ од новиот RS7, заден браник со нов дизајн, поголеми алуминиумски бандажи, и др. Стандардната хромирана предна решетка на A6 кај овој модел е заменета со сјајно црна.
Во Audi RS6 Avant најверојатно ќе биде вграден 4.0 литарскиот twin-turbo V8 бензински мотор на VW Group кој го има и во Lamborghini Urus и Bentley Bentayga, а погонот ќе биде Quattro – на сите тркала.
Во стандардната форма, овој мотор треба на RS6 да му овозможува моќност од 608 коњски сили, меѓутоа од Audi планираат и помоќна електрифицирана верзија од скоро 710 коњски сили. Доколку таа верзија се појави на пазарот, RS6 би можел да биде најбрзиот караван модел на пазарот, со потенцијално забрзување од 0-100км/ч. за околу 3.5 секунди.
Внатре се очекува новиот RS6 да има спортски кожни седишта и волан, како и последниот infotainment систем на Audi со 10.1 инчен дисплеј, и 12.3 инчна дигитална инструмент табла.