Додека единственото „блескаво“ зелено LaFerrari, сопственост на познатиот пејач Џеј Кеј ја забавуваше публиката на популарниот Goodwood Festival of Speed, еден црвен примерок со сериски број 199508 за жал доживеа сообраќајна несреќа и тоа во центарот на Монте Карло.
Егзотичниот автомобил имал „блиска средба“ со Volkswagen Golf VI, кој според прелеминарните информации, не го почитувал првенственото минување на раскрсницата, по што на него налетало Ferrari-то.
За среќа, никој во незгодата не е повреден, а дури и материјалната штета не е „инфаркт“, иако е сигурно дека дури и мала, таа ќе изнесува поприлично многу.
Иако многумина наведуваат дека ова воедно е и прв судир на овој егзотичен автомобил, всушност не е точно, бидејќи за време на завршните тестирања, на еден „камуфлиран“ LaFerrari налета камион за време на возењето на автопат во близина на гратчето Мантова.
Инаку, иако сè уште не е официјално потврдено, се претпоставува дека дотичниот LaFerrari кој настрадал во Монте Карло е истиот оној кој имаше заедничко возење со моделот Enzo на патиштата во околината на Монако.