Еден од најуспешните модели во историјата на Mazda, спортскиот модел MX-5, сега се наоѓа во својата 4-та генерација, бидејќи јапонскиот производител го претстави новиот модел за кој навистина многу се нагаѓаше и кој беше предмет на бројни шпекулации.
Визуелно, моделот и не изгледа револуционерно како што се очекуваше, со далеку помало влијание на актуелните модели кои ги извади оваа автомобилска компанија, како што на пр. е Mazda6.
И понатаму овој модел го следи дизајнерскиот правец „Kodo“, но во нешто понамалена мера во однос на остатокот од гамата, па дури и на очекување на публиката. Дали тое е добро ќе покаже времето...
Новата Mazda MX5 е 100 килограми полесна во однос на својот претходник, а нагласена е и подобрената балансираност на возилото, кое сега има идеален распоред на масата во однос 50:50, со што ветува и одлични возни карактеристики.
За сега Mazda споменува само еден, новоразвиен SkyActiv мотор кој ќе биде претставен наскоро, а најверојатно е во прашање нешто послаб 1,5 литарски агрегат од околу 140 коњски сили.
Што се однесува до цената на самиот модел, таа се уште не е соопштена, но се очекува верзијата со 1,5 литарски мотор да стартува од околу 25.000 евра во земјите на ЕУ.