На последната трка годинава во сезоната на DTM шампионатот, која се возеше на популарната германска патека Hockeheim, Audi не само што оствари тројна победа и со тоа ја освои титулата во конкуренцијата на конструктори, туку покажа и еден необичен проект под името „Piloted Driving“. Во прашање е Audi RS7 кој извозе цел круг на патеката во тркачки ритам, со време од нешто преку две минути, но без возач.
Тоа воедно беше и најдобрата демонстрација на технологијата за автономно возење, која користи GPS сигнал, WiFi комуникација со возилото и специјални 3D камери кои ја снимаат патеката, на основ кој компјутерскиот програм ги споредува информациите и ги одредува параметрите за возењето. Според зборовите на инженерот на Audi, со ова е можно да се позиционира автомобилот буквално на саканиот сантиметар на патеката.
Инаку, Audi со овој вид на технологија започна да се занимава пред цела деценија, а податоците добиени за време на истражувањата и развојот, успешно се имплементирани во некои од актуелните системи кои ги користат неговите модели, Audi Side Assist, Active Lane Assist, Adaptive Cruise Control i Pre Sense Front.