Секоја година, SEMA Show претставува едно од најголемите собири од областа на автомобилскиот „афтермаркет“, а изложбата на „тјунираните“ автомобили претставува вистински десерт и уживање!
За повеќето произведувачи автомобили кои се појавуваат на американскиот пазар, SEMA Car Show кој се одржува секоја година во Лас Вегас, е една од неизбежните „приредби“ каде се прикажуваат нивните најнови достигнувања од областа на т.н. афтермаркет производ, било да станува збор за „козметика“ или пак за чистокрвен „тјунинг“.
Јапонските автомобили во САД се едни од најомилените кога станува збор за „доработка“, Honda и Toyota секоја година подготвуваат голем број на специјални модели, со надеж дека ќе привлечат уште поголем број на фанови. Најголемиот светски произведувач на автомобили, Toyota за SEMA 2014 подготви неколку интересни решенија...
Пред се тука се моделите Sienna и Yaris во DUB Editions верзии, кои подразбираат нови, агресивни „bodykit“ додатоци и спуштени автомобили.
Потоа тука се и Sienna Remix, дело на Sirius XM и West Coast Customs, која доаѓа со специјални аудио/видео столбови на кровот, кои можат да се ротираат за 360 степени, а поседува два 40 инчни LCD монитори, четири сабфуфери и дури 16 звучници. Еднакво импресивен е и багажникот, чија врата крие вистински DJ-ски рај.
Toyota ќе ги прикаже и своите популарни теренци/SUV u TRD (Toyota Racing Development) верзии - 4Runner, Tacoma i Tundra, кои ги красат бројни додатоци наменети за екстремни off-road авантури, а тука е и Tundra TRD Pro Desert Race кој ќе се натпреварува на Baja 1000 трката.