Ако мислевте дека конечно се исцрпени сите идеи кога станува збор за Vision GT креациите, наменети за популарната видео игра Gran Turismo 6, тогаш гадно се лажете.
На саемот за автомобили во Лос Анџелес и американските произведувачи прикажаа некои нови модели, а можеби најинтересен од нив беше оној на Chevrolet, кој всушност е „виртуелен“, иако е прикажан во реална големина на штандот на споменатиот произведувач.
Во прашање е Chaparral 2X Vision Gran Turismo, специјално конструиран за како што и откривме претходно, за ултрапопуларната игра Gran Turismo 6, а претставува футуристички тркачки автомобил, кој како да е „позајмен“ од некој блокбастер СФ филм.
Она што Chaparral 2X го издвојува од досегашните Vision GT креации е револуционерниот систем на погон, кој користи ласерски сноп, централно позициониран на задниот дел од возилото, кој со своето емитување создава ударни бранови кои потоа резултираат со голем притисок кој го движи автомобилот.
Chevrolet дури и објави податоци поврзани со овој СФ болид, ласер сила од 671 KW се напојува од енергијата од литиум-јонските батерии и воздушниот генератор, што му обезбедува притисок на ранг од околу 900 „коња“! Максималната брзина, во теорија, секако, изнесува некои 386 km/h, додека забрзувањето до 100-ка би траело 1,5 секунди!
