Го вртите својот трет круг, а се уште не сте пронашле соодветно место за паркирање? Со новиот концепт на електрични возила EOssc2 овој проблем мошне лесно ќе стане минато.
Германските дизајнери од DFKI Robotics центарот во Бремен, создадоа возило кое функционира на принципот на рак и е замислено како идеално решение за пренаселените градови.
EOssc2 е ултра флексибилен мини автомобил што може да ја намали својата големина, да се паркира во мал простор и да се придвижува странично благодарение на подвижните тркала кои работат на посебни мотори. Па така неговата големина се намалува од 2,5 метри на 1,5 при што позицијата за седење и понатаму останува комфорна. Првичните верзии на возилото се уште се управуваат на традиционален начин, но производителот најавува дека во иднина EOssc2 ќе може да се вози автоматски без возач.
Брзината на возилото е 65km/h и истото може да се поврзува со други вакви возила во конвој што заштедува енергија на големи растојанија. Концептот е разработуван во текот на изминатите 3 години од страна на 10 инженери и во моментот се тестира на улиците во Бремен и Далиан, Кина.