Легендарната Zastava 101, или во народот познат како „стоеден“, и денес е прилично честа појава на нашите улици, за жал, не толку поради сентименталноста или љубовта кон „олдтајмерите“, колку поради општата немаштија на просечните жители на Македонија и регионот.
Сепак, има случаи кои им пркосат на правилата, а еден од нив е и овој бел... па да го наречеме „стоеден“, иако освен „школката“, со него и нема баш многу поврзаност. Имено, за основа се искористени многу делови од BMW (можеме да забележиме дека овој Z101 има погон на задните тркала), а според зборовите на мајсторот, го движи 2,5 литарски шестцилиндричен мотор, исто така со потекло од BMW.
Секако, за таков мотор да може да влезе во Zastava 101, целиот преден „кош“ морал да биде продолжен за некои 40 до 50 сентиметри, а за да го добиеме целиот ефект, тука се и тркалата од BMW X5. Во сево ова што го гледате е вложено многу труд и знаење, мора да се признае, меѓутоа дека крајниот резултат, барем кога станува збор за визуелниот впечаток, можел да биде нешто подобар...