Инспирирани од видеото на Buzzfeed порталот во кој личности со потекло од повеќе карибски држави си разменија десерти карактеристични за самите земји на потекло, одлучивме да ви претставиме еден од нив.
Одлучивме да го одбереме Темблеке, десертот од Порторико, и кога разгледавме за неговата подготовка всушност сфативме дека е екстремно едноставен и лесен за подготовка. Тој е всушност пудинг од кокосово млеко. Има ли нешто повкусно?
Состојки:
- 2 конзерви од по 400 мл кокосово млеко
- 150 грама шеќер
- 70 грама густин
- ¼ лажичка сол
- Кокосово брашно (за гарнир)
- Мелен цимет (за гарнир)
Подготвување:
Во подлабоко тенџере ставете го кокосовото млеко и на средна топлина додадете го шеќерот, солта и густинот, мешајте додека не се растопат. Продолжете со мешањето додека смесата не згусне, а потоа зголемете ја температурата додека таа не почне да врие и не се направат меури.
По 5-8 минути смесата ќе добие густина на пудинг, тргнете го тенџерето од рингла и ставете го во калапи или во керамички садови (претходно премачкани со масло за јадење). Можете да ја истурите и во поголем сад како тој за куглоф и да сечете парчиња од пудингот, но ако не можете да чекате подолго време да се стегне пудингот, ставете ја смесата во помали садови.
Ставете ги во фрижидер и оставете добро да се оладат. По можност и до 10-12 часа.
По традиција, садовите сo Темблеке се превртуваат на чинија, за да може пудингот да остане на самата чинија, но може и да го оставите пудингот во самите садови.
Одозгора ставете кокосово брашно или цимет.