Чоко ледените банани на стапче се повеќе прикладни за лето, но тие се лесни и вкусни и едноставно не можевме да чекаме до лето за да ви го прикажеме рецептот.
Како што кажува и самиот наслов ќе треба да го вклучите и замрзувачот во подготвувањето, но тоа нема да биде тежок процес.
Состојки:
- 200 грама чоколадо (може половина темна, а половина млечна)
- 2 лажици зејтин
- 3 банани
- 6 стапчиња за сладолед
- Широк плех и хартија за печење или алуминиумска фолија врз него
- Сецкани бадеми, кикирики, чоколадни трошки, кокос, корнфлекс, бомбони за декорација
Подготовка:
Излупете ги бананите, пресечете ги на половина и кај исечената страна набодете ги стапчињата за сладолед. Ставете ги на плех и оставете ги во замрзнувач да се смрзнат околу 30 минути.
Стопете го чоколадото врз пареа или во микробранова, и во садот додадете ги 2-те лажици зејтин. Оставете го садот со чоколадото на страна и извадете ги бананите. Секоја половина од бананите прелијте ја со стопеното чоколадо додека не биде речиси целосно обложена, а веднаш потоа извалкајте ги во одбраните декорации.
Вратете ги во замрзувач околу 15 минути да се стврднат и послужете.