Сплитскиот готвач Хрвоје Зиројевиќ ги претвора остатоците од риба и морски плодови во брашно, чипс и желе со кои го освојува пребирливиот вкус на многу светски ѕвезди од калибарот на Бијонсе и Џеј Зи, како и на принцовите од Јордан и Саудиска Арабија.
Она што на другите готвачи им изгледа како непотребен остаток, во рацете на Хрвоје се претвора во гастрономско чудо во кое се содржат најразлични медитерански вкусови и мириси.
Па, така од обвивката на шкампите прави сос за тестенини, коските од риба ги претвора во чипс кој одлично оди со пиво, додека од морските алги создава морско желе. Мешункастите растенија како грашокот и гравот ги дехидрира во печка со цел да направи „пепел“ што потоа го користи како додаток за рижото, тестенини и салати.
-Мојата филозофија е да се искористат што повеќе квалитетни свежи намирници, а воедно и делови кои луѓето ги фрлаат. Така со главата на рибата можете да го ароматизирате маслиновото масло, а од коските може да направите чипс. Овој пристап кон намирниците не е воопшто финансиски занемарлив, вели Зиројевиќ.
Неговите јадења се резултат на древни далматински рецепти и сезонски свежи намирници, па не ретко ја користи морската вода за готвење на рибата како што на времето правеле старите рибари.