Рајан Лохти оваа недела ќе биде дел од 4-та летна олимпијада во неговата професионална спортска кариера. Американскиот пливач се квалификува за натпреварување во 2 дисциплини: 200 метри индивидуално мешано и 800 метри слободен стил, а оваа недела останува да видиме дали ќе успее да донесе нови медали за селекцијата на САД.
Но, дали знаете која е неговата диета? Да, таа не е екстремна како 12.000 –те калории кои неговиот колега Мајкл Фелпс ги внесува на дневна база, но таа е исто така богата со калории.
Лохти според изјавите кои ги даде за медиумите внесува од 7000 до 8000 калории дневно распоредени низ повеќе оброци.
Наутро за појадок јаде 6 јајца со спанаќ и сирење, домати и шунка, а потоа компири подготвени на различен начин, овесна каша, палачинки, овошје а на крајот од појадокот пие кафе со млеко и многу шеќер.
На една недела пред било какво натпреварување јаде екстремно многу јагленхидрати како тестенини и леб. Фетучини Алфредо се омилените тестенини на Лохти, но исто така на менито се и многу јадења со протеини како пилешко и стекови кои му ги подготвува приватен готвач. Бидејќи како што призна и самиот пливач, тој не знае да готви.
Два или три часа пред трка јаде исто така голем оброк и ќе испие апче со кофеин наместо енергетски пијалак, а сакајќи да остане во чекор со трендовите јаде и доста храна приготвена со тофу, зеленчук и авокадо.
Петок е ден за „мамење“ и тогаш си дозволува „брза храна“. Рајан во петоците јаде многу хамбургери, пица, сладолед, пржени компири, пржено пилешко и пие газирани пијалаци кога си дозволува и една чаша црвено вино.