Започнува периодот кога на големо подготвуваме зимница. Доколку имате во план да направите ајвар, туршија и уште по некои зеленчуци во расол, ние ви предлагаме да направите и доматен сос, кој ќе го обожавате во текот на целата зима. Совршен е за во паста, во комбинација со мелено месо, па дури и за со домашни погачи. Се складира исто како и ајварот, во тегли бидејќи на тој начин ќе биде вакумиран и нема да се расипе.
Потребни состојки:
- 500гр домати
- Кромид
- 3 чешлиња лук
- 4 лажици маслиново мало
- Босилек
- Листови свежо оригано
- 1 ½ лажица кафеав шеќер
- Сол и бибер
Начин на подготовка:
Исчистете ги кромидот и лукот и ситно исечкајте ги. Доматите измијте ги и ставете ги во зовриена вода неколку секунди, а потоа изладете ги со млаз ладна вода. Излупете ги и исечкајте ги.
Во сад со врело масло ставете го кромидот 5 минути за малку да омекне. Додајте ги доматите и лукот. Кога сосот ќе зоврие, додадете го шеќерот и мешајте на ниска температура, додека состојките не омекнат, а смесата не се згусне. На крај зачинете со босилек и оригано и додадете сол и бибер по вкус.
Жешкиот сос ставете го во стерилизирани тегли. Откако ќе ги исполните теглите, дополнете ги со маслиново масло до врвот.