Многумина од нас кога одат на одмор без проблем ќе потрошат некое евро плус на убава и вкусна морска храна. Лигњите се едни од најчесто нарачуваните јадење во познатите летни одмаралишта и несомнено едни од највкусните.
Сепак, кога станува збор за нивното приготвување во домашни услови, повеќето се откажуваат од идејата за готвење, плашејќи се дека ќе биде премногу комплициран процес.
Доколку имате желба да ги изненадите своите најблиски со овој морски деликатес, ви предлагаме еден мошне брз и лесен рецепт.
Најпрвин упатете се до најблискиот поголем маркет каде што може да купите свежи лигњи и побарајте од вработениот убаво да ги исчисти. Кога ќе пристигнете дома, проверете дали случајно останале некои цврсти делови. Ако забележите таков дел отстранете го со нож и потоа убаво измијте ги парчињата.
Со помош на ножот направете мали засеци по површината, така што ќе добиете ромб шара и исечете ја лигњата на помали парченца.
На страна ставете брашно (по потреба) и во него додадете сол, бибер, чили во прав, копар, рузмарин и оригано. Потоа ставете ги парчињата лигња во брашното и убаво извалкајте ги од сите страни. Пржете во фритеза или пак во длабок сад со зејтин.