Сите се согласуваме дека замрзнувањето е мошне корисен и практичен начин за чување на храната. Но, постојат одредени производи кои никако не смеат да се најдат во нашиот ладилник, бидејќи го губат вкусот, но што е најважно може да станат опасни за консумирање. Кои намирници не треба да ги замрзнувате?
Храна која содржи голема количина на течност
Краставици, ротквици, лубеница, портокали и слично овошје и зеленчук кои содржат многу вода не треба да се чуваат во ладилник. Овие намирници се преполни со течност која во текот на замрзнувањето се кристализира и по одмрзнувањето целосно се менува структурата. Од друга страна пак, свежата зелена салата ќе овене и ќе стане кафена.
Млечни производи
Иако замрзнувањето на јогуртот, свежите, кремасти и полутврди сирења нема да наштети на вашето здравје, сепак тие не треба да се најдат во ладилникот. Многу ниските температури влијаат врз изгледот и структурата на млечните производи, па откако ќе се одмрзнат ќе станат водени и нема да го имаат истиот вкус.
Свежи и зготвени јајца
Јајцата се намирници кои одат во комбинација со други јадења и најдобро е да ги користиме свежи. Замрзнувањето на јајцата може да предизвика многу проблеми, но и целосно да ја промени нивната структура. Свежите јајца под ниски температури ќе се распаднат, а зготвените јајца ќе станат како гума.
Пржена и печена храна
Веќе подготвената пржена храна на висока температура или онаа печената на класичен начин, нема никогаш да биде иста по замрзнувањето. Крцкавата структура и вкус целосно ќе исчезнат, а храната ќе стане гумена и влажна.