Драги пријатели, од денеска покрај рецептите кои ги читате на Dave's Kitchen на нашиот портал, секоја недела ќе објавуваме корисни совети кои ги препорачува нашиот соработник Давор, а вие ќе можете да ги прочитате и полесно да се снаоѓате во кујната.
1. Чистење на даската за сечкање
Чистењето на даските за сечкање само со сунѓер, сјај и вода нема да ги отстрани целосно бактериите кои се насобрани во нив. Со секое сечење се прават мали гребаници кои претставуваат дом на многу бактерии.
За да го отстраните проблемот со бактериите и воопшто да не стравувате дека ќе ви направат некаков проблем ќе ви треба само 2-3 лажици сода бикарбона и половина лимон. Распределете ја содата низ површината на даската и тријте ја заедно со лимонот околу 3 минути. Овој процес ќе овозможи сокот од лимон заедно со содата да навлезе во пукнатините и да ги острани бактериите.
2. Неколку совети за кафето
За сите оние што сакаат да експериментираат со кафето и да пробаат нови вкусови, во кафето со млеко може да додадат екстракт од ванила или доколку сакаат поинтензивен вкус, екстракт од бадем или лешник. За да го направите вкусот едноставно неодолив, нанесете на површината малку цимет или мелено мускатно оревче.
Доколку не сакате кравјо млеко во вашето кафе, додадете соино, оризово или пак употребете ја најдобрата замена – кокосово млеко. Ако пак сакате да го засладите со природен засладувач, користете мед или агаве сируп.
3.Од мармалад до сос за салата
Одличен начин за да го збогатите појадокот,а воедно и да ги потрошите последните тегли џем или мармалад е да ги употребите заедно со кисело млеко и гранола.
Кога ќе ја испразните теглата се уште ќе има траги од мармаладот, а за да избегнете да го фрлите тој дел можете да направите одличен сос за вашата салата. Во теглата додадете малку маслиново масло, оцет балсамико и ¼ лажичка сенф. Затворете ја теглата и протресете ја додека сите состојки не се соединат и полејте врз свежо подготвена салата.