Има ли некој што живее тука, а не сака ајвар? Особено кога е штотуку приготвен, па со стрв можеме да си го намачкаме на парче леб и на тоа да додадеме сирење или пак маслинки. Ммм звучи вкусно нели?
Некои со нетрпение ја очекуваат ајвар сезоната, за да отидат до најблиското пазарче, да ги купат потребните состојки и да се фрлат на работа. Други пак, немаат толку време за подготвување и играат на сигурна варијанта, купувајќи си по некоја тегла од продавница.
За оние кои си се по старото добро традиционално и домаќинско подготвување, ги предлагаме следните два рецепти кои можете да ги прочитате со едноставно кликнување на линковите:
Направете го највкусниот ајвар од кој секој ќе сака тегла
По рецепт на баба: Најдобар домашен ајвар без грешка
Доколку пак сте од оние кои сакаат да испробаат нешто ново и вкусно со ајвар, тогаш топло ви препорачуваме да ги приготвите следните мини погачи со сирење.
Потребни состојки:
- 5 лажици ајвар
- 250гр путер
- 400гр брашно
- 300гр сирење
- 1 печиво
- 2 јајца
Начин на подготовка:
Во голем сад ставете ги сите состојки, а по потреба може да додадете уште брашно. Тестото треба да биде меко и малку лепливо.
Оставете го да отстои во фрижидер околу половина час, а во меѓувреме загрејте ја рерната на 200°С. Откако тестото ќе се олади развлечете го на дебелина од 1см на површина на која пред тоа сте ставиле малку брашно.
Со чаша „сечете“ облици во вид на топчиња, а потоа ставете ги топчињата на масна хартија за печење. Доколку сакате, може да ги намачкате одозгора со ајвар или да ставите уште малку рендано сирење. Печете ги во рерна околу 15-20 минути, додека не заруменат.