Како секој четврток така и денеска Давор од Dave’s Kitchen со вас споделува рецепт за вкусни вртени кифлички со сусам и чиа семе.
Одлични се за есенските денови кои претстојат.
Потребни состојки:
За тестото:
- 450 гр. брашно
- 1 јајце
- 1 кесичка сув квасец
- 200мл. млако млеко
- 100 мл. масло за јадење
- 1 лажица шеќер
- 1 лажичка сол
За филот:
- 1 јајце
- 250 гр. урда
- сол по вкус
За премачкување:
- 1 јајце
- сусам
- чиа семе
- путер
Начин на подготовка:
Најпрво подгответе го филот на тој начин што во длабок сад ќе ги промешате урдата и јајцето заедно и додадете сол по вкус.
За кифличките замесете меко и глатко тесто од брашното, сувиот квасец, шеќерот, солта, маслото за јадење, млекото и јајцето. Оставете го тестото да стаса околу 90 минути на собна температура. Тестото размесете го на набрашнета работна површина и поделете го на 12 еднакви делови. Секој дел расукајте го во елипсовидна форма и поставете го хоризонтално каде во горниот дел ќе ставите од филот, а на долниот дел ќе пресечете реси. Виткајте ја кифличката започнувајќи од филот кон ресите и на крајот превиткајте ја во форма на полжав.
Вака подготвените кифлички ставете ги во тавче обложено со хартија. Покријте ги со кујнска крпа и оставете ги повторно да стасаат околу 40-45 минути. Премачкајте ги со јајце, нанесете мали парчиња путер на секоја од кифличките и завршете со сусам и чиа семе. Печете на 180 степени околу 15тина минути.
За повеќе рецепти од Давор, погледнете на неговата FB странa Dave's Kitchen