Dave’s Kitchen: Штрудла со вишни

Оваа недела од кујната на Давор и Dave's Kitchen имаме супер вкусен и сочен рецепт за штрудла со вишни.

Потребни состојки:

• 8 кори за баклава
• 150 гр. растопен путер
• 700 гр. вишни
• 3 лажици густин растворен во
• 3 лажици студена вода
• 2 стапчиња цимет за мирис
• 370 гр. шеќер
• 4 лажици лебни трошки
• јајце за премачкување

Начин на подготовка:

Варете ги вишните со шеќерот и цимет стапчињата околу 15-20 минути. Додадете го густинот промешајте уште 5 минути на оган. Покријте со хартија за свежа храна и оставете комплетно да се излади. 

Подгответе два ролата од по четири кори.

Земете 4 кори и низ секоја премачкајте со растопен путер и пропрскајте со лебните трошки (2 лажици). Ставете пола вишни со многу малку од течноста. Свиткајте ролат и ставете го во плех претходно обложен со хартија за печење. Истото направете го и со другите 4 кори за да подготвите уште еден ролат. 

Премачкајте ги ролатите со изматено јајце, растопен путер и пропрскајте со шеќер. Печете околу 15-20 минути на 190-200 степени, додека не добијат убава златно-кафена боја.

Послужете ги додека се топли со шеќер во прав. За повеќе рецепти од кујната на Давор, посетете ја неговата ФБ страница Dave's Kitchen.