Кога се двоумите дали е подобро да подготвите топол или ладен десерт, можете да направите комбинација и од двете.
Десертот топло-ладно е изводлив и за оние кои не поминуваат доста време во кујната, а за негова подготовка ќе ви бидат потребни половина час и неколку намирници.
Магијата на чоколадна лава што тече кога ќе се отвори топлото колаче буди сензуални чувства, а нема да останете рамнодушни и на неодоливиот вкус кој го има.
За љубителите на ладниот десерт следи огромна топка сладолед која го прави овој рецепт извонреден.
Потребни состојки:
120 грама чоколадо за готвење
120 грама путер или маргарин
100 грама шеќер во прав
2 јајца
2 жолчки од јајца
6 лажици брашно
Начин на подготовка:
Во поголем сад на оган се растопува путерот на кој му се додаваат коцките од чоколадата за готвење. Откако ќе се растопат, тргнете ја смесата од оганот и додадете ги шеќерот во прав, двете јајца и жолчки од две јајца и брашното.
Мешајте се додека не добиете густа хомогена смеса, која подоцна ќе ја ставите во калапчиња за мафини или пак чоколадна лава кои претходно ќе бидат премачкани со маргарин.
Потребно е едно калапче да биде наполнето со смесата помалку од неговата половина. Ставете ги калапчињата во рерна која ќе биде наместена на 200 степени и печете ги 7-8 минути.
Откако ќе бидат готови само извадете ги од калапчето и послужете ги со топка сладолед со вкус по ваш избор.