Многумина од нас посакуваат да приготват топол леб, штотуку изваден од рерна. Доколку и вие спаѓате во таа група прочитајте ги двата корисни совети кои денеска Давор од Dave's Kitchen ги споделува со вас.
1. Трикови со квасецот
Квасецот се уништува во контакт со жешка вода. За да се активира и да започне со зголемување на волуменот му е потребна мала топлина. Кога ќе дојде во контакт со шеќер започнува да се храни со него и да создава меурчиња. Најлесниот начин да го „пресечете“ неговото растење е со користење на сол. Исто така доколку сакате можете да подготвите неколку теста пред време и да ги замрзнете, бидејќи откако ќе го одмрзнете тестото, квасецот лесно се активира и повторно може да го зголеми волуменот.
2. Замесување на тестото
Секогаш кога подготвувате леб на страна растворете го квасецот, а потоа промешајте го во другите состојки. Растворањето на квасецот одделно од другите состојки дозволува полесно да се активира и секогаш да добиете добри резултати.
Откако ќе ги промешате сите состојки заедно оставете тестото да стаса најмалку 2 часа. Или најдобро оставете го преку ноќ во ладилник бидејќи на тој начин се формира посебен шмек на лебот. Пред печење потребно е лебот оформен во посакуваната форма да стаса повторно. Печењето секогаш треба да биде во многу загреана рерна на висока температура.