Готвењето на торти не е лесна работа, особено кога ќе ни се залепи пандишпан на тавчето во кое сме го печеле или пак не сме ја изматиле доволно смесата.
Овој вторник Давор од Dave`s Kitchen со вас и со нас споделува неколку совети за тоа како да направите совршени торти секој пат кога ќе влезете во кујната.
Одберете испробан рецепт и подгответе се што можете пред да започнете со подготовка
Одберете докажан рецепт кој нема да ве изневери, користете квалитетни состојки и секогаш состојките нека бидат на собна температура освен ако поинаку не е нагласено во самиот рецепт. Пред да започнете со подготовката на смесата обложете го тавчето за печење со хартија. Иако користите хартија за печење, сепак добро е да се премачка со масло или путер и хартијата за печење. Исто така загрејте ја рерната на температурата која е потребна за да се испече пандишпанот.
Бидете прецизни во мерките и навремено додавајте ги во смесата
Доколку е потребно да се изматат путерот и шеќерот заедно додека не добиете пенеста смеса, тоа треба да трае минимум 10 минути за да може шеќерот да се стопи и не останат зрнца. Треба да внесете што повеќе воздух во смесата, на пример кога ги матите јајцата со шеќерот. Матете со движења напред назад со миксерот за да внесувате воздух, а на тој начин пандишпанот ќе биде полесен за јадење и ќе биде повоздушест. Доколку сте во можност користете дигитална вага за да имате прецизни мерки. Ако е потребно да додадете јајца во изматена смеса од шеќер и путер не го правите тоа одеднаш, туку додавајте ги јајцата едно по едно матејќи добро помеѓу секое додавање.
Имајте трпение
Печете ја тортата според упатството во рецептот и речиси никогаш не ја отварајте рерната првите 10-тина минути за да проверите како изгледа. Бидете точни со времето предвидено за печење и оставете да се излади во самиот сад околу 10 минути пред комплетно да ја одстраните од тавчето во кое се печела. Ставете ја на решетка така што пареата ќе излегува и од долната страна на тортата. Оладете ја комплетно пред да нанесете фил кој содржи слатка павлака или путер.