Скорешна студија покажала дека одржувањето на телесната тежина е поврзано не само со видот на храната која ја јадеме, туку и со брзината со која го правиме тоа.
Јапонски истражувачи следеле 1083 возрасни личности во период од 5 години, кои биле поделени во 3 категории базирани на тоа со која брзина јаделе: бавно, нормално или брзо.
Субјектите пополнувале анкета на почетокот на студијата во која ги споделиле начинот на исхрана, физичката активност и медицинската историја.
Во почетокот, ниеден од доброволците немал метаболичен синдром, т.е најмалку три фактори на ризик вклучувајќи ја абдоминалната дебелина, низок „добар“ HDL холестерол, високи триглицериди, висок крвен притисок и висок крвен шеќер – кои можат да предизвикаат здравствени проблеми како што е дијабетесот и разни срцеви заболувања.
Кога партиципантите биле испитани 5 години подоцна, 84 од нив биле дијагностицирани со метаболичен синдром, а според резултатите брзината со која јаделе била главен индикатор. Оние кој јаделе брзо имале 89% поголема шанса да имаат метаболичен синдром во споредба со другите 2 групи. Само 2.3% од оние кои јаделе бавно ја имале оваа дијагноза, во споредба со 11.6% од брзите „јадачи“.
Оние кои јаделе брзо исто така ја накачиле тежината, им се зголемил обемот на половината, а имале и повисоко ниво на шеќер во крвта во споредба со останатите.
Причината за тоа е што кога јадеме брзо, постојат големи шанси за прејадување бидејќи за да се чувствуваме сити треба да помине подолг период. Брзото јадење исто така предизвикува и поголема флуктуација на гликозата, што може да доведе до инсулинска резистентност.