Одржувањето здрав режим на исхрана е исклучително важно за време на бременоста, бидејќи на телото му се потребни дополнителни хранливи материи, витамини и минерали, а во последните 6 месеци од бременоста потребно е да се внесуваат и по 350-500 дополнителни калории дневно.
Еве која храна се препорачува трудниците да ја јадат, а која да ја избегнуваат:
Храна која треба да се јаде:
1) Грав
Гравот е богат со влакна, протеин, калциум, железо и фолати.
2) Слатки компири
Слатките компири се богати со бета каротен, соединение витално за здрав развој на фетусот. Тие содржат и влакна кои го подобруваат дигестивното здравје и намалуваат наглото накачување на шеќерот во крвта.
3) Лиснати зеленчуци
Ваквите зеленчуци (кељ, спанаќ и сл.) се одличен избор за време на бременоста, бидејќи го надополнуваат дневниот внес на влакна, калциум, железо, фолати, калиум и витамините Ц, К и А
4) Јајца
Јајцата се одличен начин во телото да се внесе протеин, здрави маснотии, витамини и минерали. Тие се и добар извор на холин, хранлива состојка есенцијална за правилен развој и раст на мозокот.
5) Цели зрна
Целите зрна се богати со Б витамини, влакна и магнезиум, а некои како овесот и киноата имаат и протеин.
6) Суво овошје
Сувото овошје е богато со влакна и калиум.
7) Авокадо
Авокадото е полно со мононезаситени масни киселини, влакна, калиум, бакар, и витамините Е, Ц и Б.
Храна која треба да се избегнува:
1) Риба богата со жива
Бидејќи живата може да влијае на развојот на мозокот на бебето, треба да се избегнуваат видовите на риби кои се богати со неа, како скуша, марлин, разни морски риби и крупната туна. Туната од конзерва има помалку жива од останатите видови, но сепак треба да се јаде умерено.
2) Сувомеснати производи
Кај овие производи постои ризик од зараза со листерија, бактерија која може да му наштети на бебето. Доколку планирате да јадете таква храна, загрејте или термички обработете ја и веднаш изедете ја.