Не постои подобар начин за да го започнеме денот со една многу вкусна домашна пита од вишни. За сите оние кои го сакаат вкусот на вишните и крцкаво тесто со полна арома на путер овој рецепт мора да го подготвите.
Потребни состојки:
За тестото:
- 310 гр. брашно
- 250 гр. студен путер исечкан на коцки
- Прстофат сол
- 2 лажици шеќер
- 2-3 лажици студена вода
За филот:
1200 гр. замрзнати вишни (или свежи)
2 пакетчиња пудинг од ванила
3 пакетчиња ванилин шеќер
150 гр. шеќер
Начин на подготовка:
Во длабок сад промешајте ги брашното, солта, шеќерот и путерот заедно. Со рацете втријувајте го путерот за да се формира смеса налик на песок. Додајте ја студената вода и оформете тесто. Оформете го тестото во топка и спакувајте го во хартија за свежа храна. Нека отстои во ладилник околу 30-40 минути.
За да го подготвите филот во тенџере на оган ставете ги вишните и шеќерот. Додајте ја ванилата и изматените пудинзи во малку вода на страна. Мешајте континуирано додека смесата не се згусне. Префрлете ја во чист сад и покријте со хартија за свежа храна на површината од филот за да не се оформи кора при ладење.
Расукајте малку повеќе од половина од тестото и обложете го тавчето за правење пита. Исечете ги рабовите и оставете повторно да се стегне. Нанесете го комплетно изладениот фил со вишни и со другиот дел од тестото пресечете ленти за да ја декорирате питата. Премачкајте ја внимателно со изматено јајце. Печете во загреана рерна на 200 степани околу 15 минути, а потоа намалете на 180 и печете уште 30 минути.
Оставете комплетно да се излади ( минимум 4-5 часа ) за да извадите убави парчиња.
Добар апетит и забавно готвење! За повеќе рецепти посетете ја официјалната ФБ страна на Давор, Dave’s Kitchen.