Подгответе го тирамисуто на малку поинаков начин – во торта.
Сочен, кремав и неодолив вкус на кафе, маскарпоне сирење и ванила. Победничка комбинација за сите оние кои имаат истенчен вкус.
Потребни состојки:
- 1 парче готов пандишпан
- 600 гр пишкоти
- 500 гр маскарпоне сирење
- 60 гр шеќер во прав
- 6 белки
- 150 гр шеќер
- 2 пакетчиња ванилин шеќер
- 6 жолчки
- 100 гр шеќер во прав
- 1 пакетче желатин, растворено во вода и растопено на пареа
- 1 шолја од 300 мл. јако сварено еспресо
- Kакао
За декорација:
- 2 кесички шлаг изматени со 250 мл. млеко
- Парчиња чоколадо
Начин на подготовка:
Најпрво во сад на пареа изматете ги жолчките заедно со 100 г шеќер во прав и постојано матејќи, гответе ги околу 10 минути. Тргнете од пареа и во длабок сад изматете ги белките со 150 гр шеќер и две пакетчиња ванилин шеќер во цврста пена. Во посебен сад изматете го маскарпонете со 60 гр шеќер во прав. Во садот со изматеното маскарпоне додајте ги зготвените жолчки и промешајте. Додајте ги изматените белки и соединете го целиот фил. На крај додајте го раствореното пакетче желатин на пареа и добро промешајте.
Во округло тавче на механизам ставете го готовиот пандишпан и потопете го со малку сварено еспресо. Додајте од филот со маскарпоне и израмнете низ целата површина. Нарусете какао, а потоа наредете еден слој пишкоти потопени во еспресо. Нанесете од филот со маскарпоне и нарусете какао. На крајот завршете со ред пишкоти потопени во кафе и тенок слој од филот со маскарпоне. Нарусете какао.
Изматениот шлаг пренесете го во кесичка за декорација и формирајте мали топчиња на врвот на тортата. Нарусете со какао и декорирајте со парчиња чоколадо во средишниот дел од тортата. Оставете ја да се стегне минимум 4 часа во ладилник или преку ноќ. Пресечете парчиња и послужете.
Добар апетит и забавно готвење! За повеќе рецепти посетете ја официјалната ФБ страна на Давор, Dave’s Kitchen.