Пред да преминеме на летните рецепти за овошни колачи и торти, ви предложуваме торта која се базира на чоколадо и слатка павлака и која ќе ве изненади со нејзиниот фантастичен и лесен вкус. Станува збор за кремастата торта Монте, која се состои од три слоја, а за нејзината подготовка не е потребно печење.
Состојки:
- Прв крем: 1 л. млеко, 100 гр. густин, 100 гр. шеќер, 1 ванилин шеќер и 125 гр. путер
- Втор крем: 500 мл. слатка павлака (хопла) и 200 гр. чоколадо
- бисквити
- малку рум
Подготовка:
1. На помало тавче за печење наредете ги бисквитите во еден слој и премачкајте ги со малку млеко помешано со рум.
2. За првиот крем ставете го млекото на рингла да се топли и додадете малку рум. Во друг сад измешајте го шеќерот и густинот со малку ладно млеко за да добиете изедначена смеса. Кога млекото ќе зоврие, додадете ја смесата со густинот и на послаб оган мешајте околу 2 минути. Во врелата смеса додадете го путерот и прелијте ја врз бисквитите.
3. За вториот крем, на послаб оган загрејте ја слатката павлака во која сте го додале исечканото чоколадо, а кога истото ќе се стопи, прелијте го врз првиот крем и оставете ја тортата да се олади.
Вашата Монте торта е готова! Уживајте во нејзиниот вкус, кој е идеален за послужување со попладневното кафе.