Време е на велигденските пости, па така на многу трпези неизбежен гостин во менито е гравот. Било да го сакате варен, во салата или пак тавче, треба да знаете дека тој е фантастичен за вашата крвна слика.
Верувале или не, добриот стар грав на посен начин го намалува лошиот холестерол. Секојдневната консумација на варениот грав е поврзана со ниската концентрација на т.н. лош (LDL) холестерол во крвта.
Канадските научници од Сент Мајклс болницата во Торонто, на основ на следењето на 1.037 испитаници, пресметаа дека секојдневното консумирање на варен грав или друг вид на мешунки (грашок, леќа, боранија...) може да биде поврзано со пет отсто помала концентрација на LDL холестеролот во крвта. Учесниците на истражувањето на овој вид на исхрана се придржувале просечно шест седмици.
Професионалното списанието "Canadian Medical Association Journal“ додава дека повеќето испитаници биле во средните години од животот, а мешунките во поглед на контролата на лошиот холестерол биле нешто поефикасни кај мажите.
Истражувачите објаснуваат дека поголем дел од уделот на гравот и другите мешунки во исхраната резултира со намалена консумација на намирници со поголема количина на масти или поголем гликемиски индекс. Со тоа, мешунките се добар извор на влакна, протеини од растително потекло, витамини и минерали.