Кората од банана ја фрламе без трошка грижа на совест, а всушност не знаеме колку е корисна. Имено, таа има бројни предности кои делуваат на нашето здравје и убавина.
- Кората може да содржи три до четири пати повеќе растителни влакна отколку плодот, а влакната се важни кога станува збор за прочистување на телото од токсини, вели познатата нутриционистка Кимберли Снајдер.
Во кората се наоѓа и изобилство на витамини и антиоксиданси кои се добри борци против прераното стареење. Покрај тоа, таа содржи многу малку калории, масти и шеќери.
Исто така, лушпата од банана го зголемува нивото на серотонин, кој влијае на доброто расположение. Бананата е добар извор на калиум, но Снајдер вели дека лушпата содржи многу повеќе растворливи влакна кои ќе ви овозможат продолжено чувство на ситост и ќе ви помогнат да го намалите лошиот холестерол. Покрај растворливите влакна, богата е и со нерастворливи, кои се одлични за дигестивниот тракт.
Во некои делови на светот, како што се Индија и Азија, сосема вообичаена практика е пржењето или варењето на лушпата од банана, која се користи во десертите. Обидете се да додадете парче во вашето smoothie или во колачите. Колку бананата е позрела, толку нејзината лушпа е потенка и повкусна.
Во кората, пак, на цитрусите, како што е портокалот, се наоѓа поголема количина на витамин Ц отколку во сокот, а ги содржи и витамините А и Б и важни минерали, како цинк, калциум, селен и манган. Изренданата кора можете да ја додадете во разни преливи за салати или во десертите.
Исто така, треба да се напомене дека кората на лубеницата е богата со витамин Ц, Б6 и цитрулин, аминокиселина која се грижи за крвните садови и придонесува за подобрување на циркулацијата. Отстранете го зелениот дел од кората, а белиот ставете го во соковник или блендер, заедно со сочниот розев плод.
Мора да имате во предвид дека кората треба да ја користите само од оние плодови при чие одгледување не биле користени пестициди.