Кога зборуваме за овесот, треба да се нагласи дека станува збор за лековита намирница од драгоцена нутриционистичка вредност која доаѓа од самото зрно. Покрај белковините, мастите, јаглехидратите и минералите, овесот содржи голема количина на калиумова сол, скроб и шеќери.
Од излупените зрна на овесот се добива лесно сварлива храна за децата и лицата со отежната дигестија. Оваа житарка стана многу важна во исхраната на луѓето, благодарение на големата хранлива вредности и масните киселини кои се распоредени во идеален размер.
Експертите велат дека зрното овес е најдобар извор на калциум меѓу житарките и придонесува за здравјето на коските и на забите. Необично е важен во диеталната исхрана, бидејќи во себе содржи многу важни витамини и минерали. Бета-глуканите во овесот го намалуваат холестеролот во крвта и со тоа ја намалуваат опасноста од болести на срцето и крвните садови.
Овесот може да се користи како прилог, во комбинација со разни видови на зеленчук во салати и варива или, пак, со јогурт или млеко и овошје, кога е во вид на овесни снегулки. На варениот овес може да му се додадат исечкани домати, краставици и кромид, прелив за салата и да се попрска со свежо исечкани зачински билки како магдонос и нане, со што добивате здрава, вкусна и освежителна салата.