Бозата е ориентален напиток, стар повеќе од илјада години. Некогаш на овие простори во секоја слаткарница се служела освежителната боза, а денес можеме да ја нарачаме само во мал дел од нив.
За разлика од нездравите, газирани напитоци кои се преполни со штетни состојки и кои денешните деца ги пијат во големи количини, бозата е природен, здрав и исклучително хранлив напиток преполн со витамини. Содржи голема количина Б витамини (Б1, Б2, Б3, Б6 и Б12), витамин А и Е, како и железо, а ценета е и како напиток кој го полни организмот со сила и енергија. Бозата содржи голем број корисни бактерии, особено е добра за спортистите, трудниците и родилките.
Рецептот за боза е едноставен и секој може без проблем да ја направи во својот дом.
Потребни состојки:
- 5 л вода
- 1 кг шеќер
- 600 гр непросеано пченкарно брашно
- 30 г квасец
Подготовка:
Пченкарното брашно прелијте го со 5-те литри топла вода и оставете го да отстои еден ден. Утредента варете го 2 часа со повремено мешање. Кога ќе се олади додадете го квасецот, така што претходно ќе го промешате во малку вода и ќе го оставите да нарасне. Помешајте и оставете така да отстои преку ноќ.
Следниот ден процедете и додадете го шеќерот. Добро измешајте додека шеќерот не се растопи.
Заради релативно големата содржина на квасец, бозата не може долго да го задржи слаткиот вкус, бидејќи доаѓа до ферментација и претворање на мешавината на квасец и шеќер во алкохол, после што го губи својот вкус. Затоа, овој напиток задолжително треба да го чувате во фрижидер, но и да подготвувате количина која можете да ја потрошите за релативно кратко време.
Заради нејзиниот освежителен вкус, бозата се пие добро изладена, но не додавајте мраз. На здравје!