Јајцата се еден од најчестите избори за појадок, кој ќе го нахрани телото со потребните состојки за претстојниот ден. Но, не секогаш сме расположени за пржење и валкање на тавчињата.
Во таквите моменти, микробрановата печка може одлично да ви послужи. Затоа, погледнете ги овие три неверојатно брзи и едноставни начини да го подготвите вашиот омилен појадок.
Кајгана
Подмачкајте го керамичкиот сад со малку масло и во него ставете го јајцето. Изматете го со виљушка и додадете сè што вообичаено ставате во кајгана. Бидете креативни – кашкавал, шунка, лук, оригано, печурки, кисели краставички, спанаќ... Потоа посолете сè и добро измешајте, па ставете го садот во микробрановата печка на најсилно, на една минута. Извадете го садот, повторно промешајте, па вратете го на уште 30 секунди. Вашиот појадок е подготвен!
На око
Јајцето на око во микробрановата се подготвува во чинија која мора да биде загреана. Затоа, прво ставете ја само чинијата на 2 минути во микробрановата, потоа извадете ја внимателно, премачкајте ја со путер и скршете го внатре јајцето. Дупнете ја жолчката со врвот на ножот, за да не експлодира во микробрановата печка. Печете 45 секунди, а доколку белката сè уште не е готова, продолжете уште 15-тина секунди.
Поширано
Знаете ли дека најлесниот начин да подготвите поширано јајце е токму во микробрановата печка? Наполнете стаклена чинија со вода и внатре скршете едно јајце. Покријте ја чинијата со друга и така ставете ја во микробрановата печка на една минута. Проверете дали е готово – белката би требало приближно или во потполност да ја покрие жолчката. Доколку не е готово, оставете го во микробрановата уште 10 секунди.