Без разлика дали е во форма на тортелини, равиоли или пак обични макарони, пастата е едно од најраспространетите и највкусните јадења на светот.
Наједноставната варијанта е да ги јадете со кечап и сирење или кашкавал, но зошто да се ограничите на толку едноставен рецепт кога можете да експериментирате со повеќе вкусови?
Во прилог следат 3 превкусни рецепти за паста, па на вас останува да го изберете оној кој најмногу ќе ви се допадне или пак едноставно да ги испробате сите. Интересно е што ниту еден од рецептите не содржи месо, а сепак сите имаат одличен вкус.
Веге паста
Потребни состојки:
250 гр лингвини
200 мл супа
2 шолји вода
250 гр домати од конзерва
1 кромид исечкан на кругови
1 црвена пиперка исечкана на ленти
1 зелена пиперка исечкана на ленти
1 лажичка сол
1 лажичка кумин
3 чешниња ситно исечкани лук
¾ лажичка чили
3 лажички маслиново масло
¼ лажичка оригано
70 гр кисело млеко
Начин на подготовка:
Во подлабок сад ставете ги сите горе наведени состојки заедно со супата и водата и зовријте ги.
Гответе околу 15-тина минути или пак додека сосот не започне да се згуснува. На крајот додадете го киселото млеко и украсете со сечкан магдонос.
Школки со сирење и брокули
Потребни состојки:
- 250 грама варена паста во облик на школки
- 1 китка брокула
- 1 помал кромид ситно исечкан
- 400 мл млеко
- 3 лажици брашно
- 3 лажици путер
- 200 гр изрендан чедар кашкавал
- 100 грама пармезан
- сол и бибер
Начин на подготовка:
Ставете ги путерот и кромидот во сад на оган и пржете додека малку не зарумени. Потоа додадете го брашното и мешајте со маталка додека не добиете паста.
Следниот чекор е пополека да започнете да го додавате млекото. Откако ќе добиете убав сос, кон ова го додавате ренданиот кашкавал, солта и биберот. Можете да ставите и малку лут сос, но тоа е опционално.
Обарените брокули и варената паста ја додавате во сосот и целата содржина ја варите додека не дојде до состојба на вриење. Откако сте го ставиле јадењето во садови за служење од горе ставате од пармезанот.
Паста со печурки и спанаќ
Потребни состојки:
4 лажици маслиново масло
300 грама исечкани печурки
200 гр свеж спанаќ
3 печени црвени пиперки (може и од тегла)
2 чешниња лук
1 лажица црвен оцет
250 грама варена паста
1 лажичка сол
½ лажичка бибер
Начин на подготовка:
Во сад на оган ставете малку вода и додадете го маслиновото масло. Потоа додадете ги печурките и пржете додека убаво да ги карамелизирате. Откако ќе го направите тоа можете полека да го додавате спанаќот.
На страна во блендер ставете ги пиперките, лукот, оцетот и посолете. Смесата што ќе ја добиете додадете ја во печурките и спанаќот. Повторно пропржете малку и на крај ставете ја готовата паста.