Дали сте вие меѓу оние кои го обожуваат вкусот на путерот од кикирики?
Кикириките се добар извор на монозаситени масти, богати се со витамин Е, Б комплекс, и манган. Исто така, кикириките имаат антиоксидативни, антимикробни и антигабични својства. Благодарение на големата содржина на растителни влакна, се смета дека кикириките може да го заштитат организмот од рак на дебелото црево.
Путерот од кикирики важи за еден од најголемите извори на здрави масти, кои им се препорачуваат на оние кои имаат потреба од поголема енергија. Овој намаз е особено популарен во САД и Англија, а го има и во нашите маркети. Но, зошто да не го направте сами? Ви претставуваме едноставен и лесен рецепт за вкусен домашен путер од кикирики.
Потребни состојки:
- 500 гр кикирики (печени или непечени)
- 1-2 лажици масло
- 1-2 мали лажички морска сол
- 1 лажица мед
Подготовка:
Доколку сте набавиле печени кикирики, добро исчистете ги од лушпата. Доколку сте набавиле непечени, распоредете ги во тавче и ставете ги во загреана рерна да се печат 40-60 минути – внимавајте да не ги препечете. Потоа оставете ги да се изладат, па исчистете ги од лушпата.
Исчистените печени кикирики ставете ги во блендер или мултипрактик миксер и сомелете ги најситно што може. Додадете ги солта, медот и маслото. Се препорачува да користите масло од кикирики или кокосово, но слободно можете да употребите и маслоново или сончогледово. Продолжете да блендирате додека не добиете убаво хомогенизирана и мазна смеса, без грутки.
Добиениот путер од кикирики ставете го во тегла и чувајте го во фрижидер. Уживајте во неговиот неодолив вкус, кој можете да го комбинирате со банани, мармалад, ореви, сладолед од ванила... употребете ја вашата имагинација!
