Прашањето дали кафето е добро да се пие доколку сакаме да ослабеме се уште е многу дискутабилно и мислењата за тоа се поделени. Но, еден нов вид на кафе станува многу популарен меѓу оние кои се борат против вишокот на килограми.
Станува збор за путер-кафето, кое всушност е дупло еспресо со густа пена, лажица путер и лажица кокосово масло. Можеби ви звучи чудно, но популарноста на овој напиток веќе се рашири низ Америка и Велика Британија. Новите истражувања откриваат дека мастите се подобри за нашето тело од шеќерите, особено кога се работи за телесната тежина.
Масното кафе за сега може да се купи на неколку места во Лондон, а истото лесно може да го направите дома самите. Некои обожаватели го пијат дури и како замена за оброк. Тие тврдат дека оваа комбинација на состојки е совршена за појадок во чаша, кој истовремено дава енергија, ја подобрува концентрацијата, согорува калории и го одржува чувството на ситост.
Негативно е тоа што има малку специфичен вкус и тоа што повеќемина кои го пробале за прв пат имале проблеми со дијареа и мачнини.
Овој масен напиток го осмислил американскиот претприемач Дејв Аспреј, кој пиел чај со путер додека патувал низ Тибет. Така дошол до идеја да измисли пијалак со ниска содржина на јаглехидрати и високо ниво на масти, кои, како што вели тој, штитат од замор и некои хронични болести, а овозможуваат и слабеење. Оние кои го пијат овој пијалак наутро, наводно остануваат сити до ручек.
Путер-кафето е најважниот фактор во неговата диета. Тоа се прави од органско кафе, путер и органско кокосово масло. Со мешање на овие состојки се добива кремасто кафе со вкус на кокос, кое останува во устата после пиењето.
Многу нутриционисти веќе ја имаат применето оваа диета и станале нејзини заговорници, но во исто време постојат многу експерти на кои не им е јасно како ова кафе може да допринесе за слабеењето.
Според зборовите на нутриционистот Сараха Шенкер, со пиење на високомасни и висококалорични напитоци всушност можете лесно да се здебелите, наместо да ослабете. Но, поборниците на ова кафе својата теорија ја бранат со фактот дека истото долго ве држи сити и ве спречува да посегнете по покалорични намирници.