Сите сакаме рецепти кои се вкусни и практични за подготовка, па токму затоа секогаш нè радува кога ќе пронајдеме нешто кое нема да ни го одземе времето, а ќе нè натера да си ги излижеме прстите.
Што вели денес да ги засукаме ракавите и да направиме полнети лепчиња со кашкавал и млад кромид?
За овој рецепт ќе ни бидат потребни:
- 300 гр брашно
- 1 лажица маслиново масло
- Сол и бибер
- Околу 150 мл вода
- 150 гр рендан кашкавал
- 5 млади кромитчиња сечени на крукчиња
- 2 лажици зејтин
- 2 лажици путер
Во сад ставете ги маслиновото масло, брашното, солта и биберот, а потоа започнете да додавате вода додека не замесите меко нелепливо тесто. Откако сте го направиле тоа премачкајте го тестото со маслиново масло и оставете го отстои еден час.
Потоа поделете го тестото на 6 парчиња, набрашнете ја работната површина и со секое парче размесете го во тенка кружна или благо овална форма.
На едната половина од секој круг ставете по малку од наренданиот кашкавал и младиот кромид, па превиткајте со другата половина и спојте го тестото со помош на виљушка.
Во тавче ставете го зејтинот и растопете го путерот. Откако добро ќе се загреат ставете ги полнетите лепчиња и пржете неколку минути на среден оган се додека добро не се зацрвенат од двете страни. Служете ги топли со сос или кисело млеко.
