Шеесет и деветто издание на Канскиот филмски фестивал започна во препознатливиот гламурозен стил.
Холивудските ѕвезди блеснаа во креации со потписот на Версаче, Армани, Живанши, Шанел и ред други светски реномирани брендови.
Атрактивната русокоса, Блејк Лајви ги сврте погледите кон себе во прекрасно парче од Версаче, кое совршено се припи на нејзината фигура.
Актерката, која е во првите месеци од бременоста, весело позираше пред фотографите за време на премиерата на „Café Society“.
На црвениот тепих можевме да ги видиме и Кристен Стујарт, Џулиен Мур, Џесика Честејн, Ева Лонгорија, Викторија Бекам, Кристен Дунст и Наоми Вотс.
Стујарт, како заштитно лице на Шанел, зачекори во комбинација од А-здолниште и проѕирна црна кошула, додека Џулиен Мур ја видовме во Живанши.
Честејн, Вотс и Дунст се определија за повесел избор на бои, па така црвенокосата Џесика пленеше во жолт фустан од Армани, Вотс беше убавица во нежно виолетов модел од истиот бренд, додека Дунст се определи за креација од Гучи.
Поранешната Спајс девојка, Викторија Бекам, овој пат ја видовме во црно-бела комбинација со панталони и високи потпетици.
Бекам излезе од клишето на долги фустани и се потруди да биде забележана во модел со строга линија. Нејзината најдобра пријателка, очајната домаќинка Ева Лонгорија, носеше креација во бела боја и тоа модел од колекцијата на Памела Роланд.
