Компанијата Volkswagen откри дека новиот салон модел наречен Arteon ќе биде „ѕвездата“ на 2017 Geneva Motor Show во март, пред да се појави на продажба наредната година.
Овој сосема нов модел ќе се наоѓа над Passat во распонот модели на VW, и ќе го замени моделот CC кој наскоро треба да прекине да се произведува, иако не директно, туку ќе биде една класа погоре.
Сега засега е објавен само тизер цртеж кој ја прикажува профилот на автомобилот, од кој што се забележува дека Arteon ќе биде купе со четири врати многу слично на Mercedes CLS моделите.
Инаку, VW го најавуваат Arteon како ривал на BMW 4 Series Gran Coupe, што значи дека и стартната цена најверојатно ќе им биде слична – околу 35 000 евра. Моделот би требало да претставува вовед во новиот „хоризонтално акцентиран“ изглед на брендот, со, меѓу другото, голема предна хоризонтална решетка и LED фарови и странични прозорци без оквири. Се очекува просторот во багажникот да изнесува околу 17000 литри со спуштен задниот ред на седишта.
Во Arteon ќе биде вградена технологија за асистирање на возачот, како и опции за полу-автономно возење, за чии спецификации ќе се знаат подоцна.
Според шпионските фотки на прототипот може да се забележи дека екстериерот ќе биде во голема мера инспириран на Sport Coupe GTE концептот прикажан на 2015 Geneva Motor Show, со многу позаоблена предница во споредба со онаа на Passat.
Компанијата потврди дека Arteon ќе ја користи MQB платформата, но таа ќе биде продолжена за 5cm за потребите на ова купе.
Се очекува на располагање да бидат познатите VW 4-цилиндрични бензински и дизел мотори, но можен е и plug-in хибриден модел како концептот од 2015 со 3.0 литарски бензински мотор кој во комбинација со електромоторите ќе има моќност од 380 коњски сили, CO2 емисии од 46g/km, и потрошувачка од 50km/l.