Од утре (3-ти март), па сè до 9-ти март, традиционално ќе се одржат Вечерите на женски права – настан кој нуди алтернатива во прославувањето на Меѓународниот ден на жената, 8-ми март.
Годинава, преку уметност, филм и музика ќе се поттикнат мажите и жените да размислуваат критички за родовата (не)еднаквост и да одадат почит на досегашните достигнувања.
Во програмата ќе биде вклучена проекција на 4 документарни филмови кои поттикнуваат критичко размислување за улогата на жената во време на криза, како и тематски дискусии со дел од режисерите на овие филмови, локални активисти, експерти и целата јавност. Дополнително, посетителите ќе можат да погледнат меѓународна изложба на слики на тема „Супер хероини“, базар на ракотворби и уметнички дела, работилници за стрип, фотографија, раскажување, трансакциска анализа, јога како и работилница за надминување на стравот од породување.
Целата програма за настанот, кој ќе се одржи во Младинскиот културен центар, можете да погледнете на следниот линк.
Настанот „Вечери на женски права“ се организира од 2010-та година. Успешната реализација на досегашните изданија е резултат на соработката помеѓу Град Скопје, UN Women, Институт за родови студии при Филозофскиот факултет на Универзитетот „Св. Кирил и Методиј“, Универзитетот за аудио - визуелни уметности - ЕСРА, Скопје и организацијата „Една може!“.
Оваа година настанот е во организација на Центарот за истражување и креирање на политики – Скопје.