Пред да се решите да се пријавите за некоја трка или едноставно со пријателите да трчате на подолга релација, од таа на која што трчате вообичаено, добро е да размислите за следните 6 нешта.
1)Поставување на нереални цели
Возбудата која се појавува кога се започнува некоја рутина со трчање е оправдана, меѓутоа таа рутина мора да биде во склад со вашата физичка спремност – некои решаваат веднаш да трчаат (полу)маратон, наместо некоја пократка трка (5км на пример), со што драматично се зголемува можноста од повреда, па дури и пред воопшто да се застане на стартната линија. Затоа, бидете внимателни и поставете си реални цели за остварување, доколку сакате конзистентност во вежбањето и избегнување на повреди.
2)Нејадење пред трката
Од исклучителна важност е телото да има доволно „гориво“ составено од вистинските хранливи материи пред било која, особено подолга трка. Тука од големо влијание е и тајмингот – многу од тркачите внесуваат јаглехидрати претходната вечер (доколку трката е наутро), за кое време тие всушност ќе се потрошат и нема бидат корисни како „гориво“ за време на трката. Ваквиот тип на храна е пожелно да се внесе 2 до 4 часа пред почеток на трката.
3)Пребрзо трчање на почетокот на трката
Доколку трката ја започнете со спринт, ќе се заморите пред таа всушност вистински да започне. Многумина ја прават оваа грешка мислејќи дека ќе го издржат брзото темпо и дека на тој начин ќе „побегнат“ понапред од конкуренцијата и таа раздалечина ќе ја одржуваат до крај на трката, дури и ако забават. Секогаш започнувајте побавно и трчајте го последниот половина час од трката побрзо отколку првиот половина час.
4)Недоволна или преголема хидратација
Многу тркачи потценуваат колку вода му е потребна на телото за време на тренингот, па така избегнуваат да ја пијат за да не им „тежи“ во стомакот. Други, пак, постојано ја внесуваат, што може да доведе до прекумерна хидратација. Затоа, пијте вода секогаш кога сте жедни, и слушајте си го телото. Во периодот на припремите, правилната хидратација може да се провери и според бојата на урината – таа треба да биде светло жолта накај проѕирна.
5)Лошо „слетување“ со стапалата
Кога станува збор за превенција од повреди, важно е да обрнете внимание на начинот на кој што стапалото „слетува“ при допирот со стазата. Студии покажале дека најмал ризик за повреда е слетувањето на средината на стапалото, наместо на петицата.
6)Носење на погрешни патики
Носењето на погрешни патики може да ја уништи рутината на вежбање и да доведе до несакани повреди. Некои патики се наменети за вежби со тегови, некои за трчање на различен вид на терен, некои се за кратки а некои за долги трки, а некои помалку или повеќе исклучиво за секојдневно шетање. Задолжително истражете (и најважно – испробајте ги на нога) кој вид на патики најмногу би ви одговарал за целта која што сакате да ја постигнете.