Модната куќа „Елена Лука“ уште еднаш покажа дека може да создаде креации кои со совршениот спој на автентичност и префинетост се на нивото на светски познатите модни брендови.
Елена ја претстави својата најнова колекција „Златни узди“ во Музејот на македонската борба за државност и самостојност, каде гламурозниот амбиент надополнет со музиката од балетот „Ромео и Јулија“ ја претвори ревијата во драматично модно шоу за паметење.
Несомнено е дека „Златни узди“ е колекција изработена од префинети висококвалитетни материјали кои како да играат со тантели и на крај сочинуваат една уникатна целина. Секоја креација има свој белег кој ја нагласува автентичноста и создава прекрасно прикажување на моделот. Боите кои преовладуваа на ревијата беа белата, црната и златната, а модното шоу беше заокружено со прекрасна црвена тоалета. Видовме вкупно 49 модели, совршено надополнети со посебно дизајнирани чевли и чанти со потписот на модната куќа.
- Значењето на името „Golden Reins“ или „Златни Узди“ на новата колекција, претставува суштествена компарација. Духот, силата, елегантноста и острата дефинирана интимност на коњот е само компарација со идеалот за девојката и жената, за која се наменети креациите на „Елена Лука“. Нивниот внатрешен сјај ја дава комплетната нота на нашите креации, изјави Елена.
На ревијата присуствуваа видни личности од јавниот живот, меѓу кои и Брејк, Ирена Спировска, Викторија Лоба, Сара Мејс и Мишо Спасовски. По претставувањето на колекцијата следуваше коктел на кој присутните ги споделуваа впечатоците од модното шоу и уживаа во амбиентот на музејот.
Благодарение на прекрасното претставување и прифаќање на новата колекција пролет/лето 2014, модната куќа „Елена Лука“ ќе ја продолжи својата бајка во Виена.
И посакуваме уште поголеми успеси бидејќи нејзината работа и успех е сон на секоја жена!