Дождот заигра по скопските улици, но за среќа ја поштеди модната куќа МCouture, која денес ги искористи последните зраци сонце за успешно да ја претстави својата „Fashion and Brunch“ пролет-лето колекција за 2014-та.
Ботаничката градина на „Хорти Експерт“ беше полн погодок за нежно романтичните креации на Мила Кадриу, кои на моменти драматични, на моменти совршено едноставни, раскажаа една поинаква модна приказна.
МCouture прикажа 26 модели изработени од шарени свили, транспарентни ткаенини, везени детали и пердуви наменети за жени кои посакуваат да бидат несекојдневни и дискретно да го привлечат вниманието онаму каде што ќе се појават.
Кадриу и нејзиниот тим создале лесна и прилагодлива колекција која ќе им се допадне на многумина поради интересниот спој на бои, материјали, форми како и поради разиграната елеганција која ги прави необични, а сепак сосема природни.
Н.Вуковиќ