Убав фустан, гламурозна фризура и високи потпетици кои се два броја поголеми од потребното. Целиот впечаток паѓа во вода, а во главата се врти прашањето „Како е можно да имаат цело богатство, а да не знаат да го изберат вистинскиот број на чевли?!“.
Доколку ги следите случувањата на црвениот тепих барем еднаш досега сте ја забележале својата омилена актерка, пејачка или манекенка како носи високи потпетици кои не се нејзин број. И сосема нормално се прашувате зошто? Иако за нас е неразбирливо, во светот на познатите сè има своја логика.
Повеќето од ѕвездите се нечие заштитно лице или пак имаат договор за промовирање на некоја модна куќа. Кога постои лимитирана колекција на чевли, а ѕвездата носи помал број од оние кои веќе ги има на располагање, вообичаено го зема поголемиот број. Чевлите не се купуваат, туку се земаат на користење и потоа се враќаат назад.
Освен тоа често се случува стилистите со кои што соработува да ги најдат совршените чевли за креацијата која што ќе ја носи познатата личност, но бројот да е поголем од што треба. Некои ѕвезди избираат поголеми чевли за да не си ги изгребат стапалата во мошне тесните и високи модели. Иако тоа звучи помалку смешно во светот на шоу бизнисот има сè и сешто.
